Verkefnið tók að þróast í Hollandi, en þar lærði Berndsen hljóðtækni ásamt tónlistarmanninum Hermigervli. Berndsen sankaði síðan að sér hinum ýmsu aðstoðarmönnum og eftir um eins og hálfs árs meltingu varð loksins til breiðskífa að nafni Lover in the Dark. Platan var unnin í mjög nánu samstarfi við Hermigervil – eða allt að því óeðlilega nánu, sem skilar sér mjög vel í tónlistinni.

Platan inniheldur eðalpopp undir sterkum áhrifum 80´s synthapopptónlistar, og er samanburður við sveitir á borð við O.M.D, Ultravox, Pet Shop Boys og fleiri góðar óhjákvæmilegur.

Meðal laga á plötunni eru t.d. Supertime og Lover in the Dark en bæði þessi lög hafa fengið mikla athygli á öldum ljósvakans, en ekki síður á netinu því myndböndin við lögin hafa logað eins og eldur um sinu á síðum eins og Facebook og YouTube.

Platan er jafnframt síðasta breiðskífan fyrir þessi jól á vegum Borgarinnar.

Allar fyrri plötur Hjálma hafa einnig náð gullplötusölu en engin plata sveitarinnar hefur samt selst eins vel og sú nýjasta og stefnir allt í að platan rjúfi 10.000 plötumarkið á næstunni en nú þegar hafa farið yfir 8000 plötur í dreifingu.

Gullplata Hjálma er jafnframt fyrsta gullplata á vegum útgáfunnar Borgin sem hefur þó ekki enn lifað sína fyrstu jólavertíð til enda.

Eru aðstandendur Borgarinnar og Hjálmarnir sjálfir mjög hrærðir yfir þeim frábæru viðtökum sem platan hefur fengið.

Jafnframt er ekki úr vegi að minnast á útgáfugleði Borgarinnar sem fer fram á morgun, fimmtudag, á Nasa. Húsið opnar kl. 20.30, aðgangseyrir r eingöngu 1000 krónur og þar munu Hjálmar að sjálfsögðu bregða á leik.

- Hjaltalín, Hjálmar, Megas og allir hinir

Hljómplötuútgáfan Borgin hefur á rétt tæpu hálfu ári tekist að skapa sér sess sem næststærsta tónlistarútgáfa landsins. Frá því í ágúst hafa alls níu breiðskífur komið út á vegum félagsins og hafa þær allar með tölu fengið fádæma góð viðbrögð. Þessum góða árangri vilja aðstandendur Borgarinnar fagna og því fer fram mikil útgáfugleði á Nasa, næstkomandi fimmtudagskvöld. 

Þar koma fram Hjaltalín, Megas & Senuþjófarnir, Hjálmar, Baggalútur, Sigríður Thorlacius & Heiðurspiltar, Snorri Helgason og Berndsen, en allir þessir listamenn hafa gefið út plötur á vegum Borgarinnar á árinu.

Aðgangseyrir verður eingöngu 1000 krónur en fyrir 2000 krónur fæst aðgangur að tónleikunum og ein af plötum Borgarinnar. Allur hagnaður af tónleikunum mun renna til Fjölskylduhjálpar Íslands, og hefur Borgin sett sér það markmið að gefa að lágmarki 500.000 krónur, jafnvel þó heildarhagnaðurinn verði minni.

Borgin leitir einnig eftir fyrirtæki sem er tilbúið til að jafna þá upphæð sem mun renna til Fjölskylduhjálparinnar, og skora aðstandendur Borgarinnar á öll fyrirtæki í landinu að sýna hug sinn í verki og hjálpa til við að styrkja þær fjölskyldur sem eiga í erfiðleikum með að halda gleðileg jól.

Húsið opnar kl. 20.30 og er fólk hvatt til að mæta snemma því það verða engir aðrir en Megas & Senuþjófarnir sem stíga fyrstir á svið kl. 21.00.

Liðin eru ár og öld síðan að hljómsveitin múm hélt tónleika í Reykjavík. Ef frá eru talin þau örfáu skipti sem sveitin hefur komið fram á tónlistarhátíðum, og að hita upp á endurkomu Sykurmolanna, eru þetta fyrstu eiginlegu tónleikar hljómsveitarinnar á landinu í fimm ár – eða síðan sveitin hélt eftirminnilega tónleika þann 20.desember 2004 í Íslensku Óperunni.

Í ágúst gaf múm út hljómplötuna Sing Along to Songs You Don’t Know sem fengið hefur sérstaklega góða dóma og viðtökur víðsvegar um heiminn. Síðan að platan kom út hefur hljómsveitin verið á hljómleikaferðalagi og spilað yfir 70 tónleika í Evrópu, Norður Ameríku og Asíu og kemur til að slá botninn í heimsreisunni með tónleikum í Iðnó þann 18. desember.

Af Seabear er það að frétta að hún mun snemma á næsta ári senda frá sér sína aðra breiðskífu, en henni hefur verið beðið með mikilli eftirvæntingu eða allt frá því að frumburður sveitarinnar, The Ghost That Carried Us Away, kom út árið 2007.

Miðaverð verður sérstaklega stillt í hóf á tónleika þessara kanóna í íslensku tónlistarsenunni en aðgangseyrir verður eingöngu 2700 krónur.

Tónleikarnir fara eins og áður segir fram í Iðnó, föstudagskvöldið 18. desember og opnar húsið kl. 21. Miðasala fer fram á midi.is - http://midi.is/tonleikar/1/5797 – og í verslunum Skífunnar.

Fólk er hvatt til að tryggja sér miða fljótt og örugglega enda ekki margir miðar í boði.

Dómar um Sing Along to Songs You Don’t Know

**** Fréttablaðið // “Sing Along er ólík fyrri plötum múm, bæði fjölbreyttari og poppaðri. Best íslenska platan á árinu hingað til.”

***1/2 Morgunblaðið

**** Mojo // “arguably a career peak.”

**** Times // “The listening experience evokes a pleasurable sadness that soothes and disorientates.”

**** The Independent // “Iceland’s dream-scapists fifth album delivers discreetly dark magic. Strangeness and charm colour their twinkling, lo-fi sounds and haunting melodies: they sculpt worlds of their own. But a sense of danger shades the album, innocence and experience suspended in often spell-binding balance.”

8/10 Clash // “múm have produced an innately beautiful record, again proving that experimental songwriting is far from dead.”

The Observer // “Effortlessly blending haunting harmonies with electronica, percussion, strings, piano and even parakeets chirping, the collective has produced a richer and more accesible album than previous efforts. Aglow with creative energy and eccentricity, this is beautiful stuff”

*** Q Magazine // “Their masterstroke is to offset the the “difficult” percussion with lush, vocal harmonies and dreamy folk pastoralism. The result is a delicate, but compelling balance of rough and smooth”

*** The Guardian // “It’s a sweet hotpot of of northern European record-making.”

Gripurinn nefnist I’m Gonna Put My Name on Your Door og er fyrsta sólóplata Snorra Helgasonar. Snorri er vel þekktur sem gítarleikari, söngvari og aðallagahöfundur Sprengjuhallarinnar og eftir hann liggur eitt vinsælasta lag þessa áratugar, Verum í sambandi.

Hér er hann einn á ferðinni með 11 popplög í blússkotnum og einföldum búningi. Frábærar lagasmíðar og einlægur og vandaður flutningur skilar hér plötu sem á eftir að marka spor í íslenska útgáfusögu og lifa í menningararfi þjóðarinnar um aldur og ævi, hvorki meira né minna.

Platan inniheldur meðal annars lagið Freeze Out sem hefur notið mikilla vinsælda á öldum ljósvakans síðan snemmsumars. Nú er jafnframt komið nýtt lag í spilun. Lagið heitir Don’t Let Her og var tekið upp “live” (þ.e.a.s. spilað inn og sungið á sama tíma) í Hljóðrita í Hafnafirði í september síðastliðnum.

Upptökum á plötunni var stýrt af Kristni Gunnari Blöndal og Styrmi Haukssyni og meðal þeirra er lögðu hönd á plóg voru Kristinn Gunnar Blöndal, Birgir Ísleifur Gunnarsson, Teitur Magnússon og Sigurður Tómas Guðmundsson.

Undanfarnar vikur hefur Egill verið áberandi vegna útkomu geisladisksins Egill S og á næstu dögum mun glæsileg bók um listamanninn prýða hillur bókaverslana bæjarins.

Egill er einn þeirra listamanna sem sýnir á Carnegie Art Award 2010 en hann hefur verið afkastamikill í sýningahaldi og gjörningagerð á undanförnum árum. Fyrr á þessu ári var sýndur samtímis í Þýskalandi og Frakklandi þáttur á hinni virtu sjónvarpsstöð Arte um Egil og framundan bíða hans sý ningar í virtum listastofnunum á borð við Frankfurther Kunstverein, Göttingen Kunstverein og víðar.

Samhliða sýningu Egils í Hafnarhúsinu verður á dagskrá fjölbreyttir viðburðir sem tengjast hinum ólíku miðlum sem Egill vinnur í. Má þar nefna listamannsspjall Egils við Karolin Tampere 5. nóvember, en Karolin hefur víða getið sér gott orðspor fyrir sýningarstjórn og umsjón með listaverkum á opinberum svæðum. Listamannsspjallið er unnið í samvinnu við Sequences gjörningahátíðina og það sama er að segja um gjörninginn The Mind sem Egill fremur í samvinnu við Marcia Moraes. Um miðjan desember standa Listasafn Reykjavíkur og hljómplötuútgáfan Borgin fyrir tónleikum í Hafnarhúsinu þar sem Egill kemur fram með mörgum þekktum tónlistarmönnum.

STAÐARANDI OG FRÁSÖGN

Á sýningu Egils Sæbjörnssonar í Hafnarhúsinu er lögð áhersla á frásögnina í verkum hans. Sýnd verða verk sem unnin hafa verið frá árinu 2006 með áherslu á samtal persóna eða hluta sem fela í sér eins konar framvindu eða tíma. Staðir og hlutir búa yfir lífi sem birtast innan eða utan veggja sýningarýmis við nærveru manneskjunnar. Með þekkingu sinni varpar manneskjan merkingu á það sem á vegi hennar verður. Egill notar gjarnan tónlist í verkum sínum og gjörningum, en á sýningunni bregður fyrir lögum og brotum úr lögum á nýútkomnum geisladiski Egils. Egill býr og starfar í Berlín.

Sjá hér nánar um Egil og verk hans: i8 gallery og Grusenmeyer Art Gallery.

IV er eins og nafnið gefur til kynna fjórða plata Hjálma, vinsælustu hljómsveitar Íslands, og var tekin upp í Hljóðrita og Jamaica. Heimildarmynd um frækna för Hjálmanna til fyrirheitalandsins fylgir fyrsta upplagi plötunnar. Nú fer hver að verða síðastur að tryggja sér eintak af þessu upplagi því platan selst eins og heitar lummur.

Óhætt er að fullyrða að sjaldan hefur jafn mikil eftirvænting ríkt fyrir útgáfu nýrrar Hjálmaplötu enda hafa nú þegar fjöldamörg lög af henni hlotið mikla útvarsspilun. Má þar t.d. nefna Manstu, Þá mun vorið vaxa, Heyrist hverjum og Það sýnir sig. Það vakti einnig miklar eftirtekt að sveitin hélt alla leið á heimaslóðir reggísins á Jamaíka til að vinna plötuna. Heimsóttu piltarnir hljóðverin Tuff Gong og Harry J Studio auk þess að fá til liðs við sig ýmsa þaulreynda innfædda tónlistarmenn.

Óhætt er að fullyrða að Jamaíkaferðin skilar sér beint í tónlistarslagæð plötunnar því hún er án vafa gleðilegasta og bjartasta hljómplata Hjálma til þessa. Í raun má fullyrða að Krókódílaplatan sé hreinræktaðasta reggíafurð Hjálma.

Hinn séríslenskur keimur Hjálma er þó enn til staðar, því platan var einnig að miklum hluta unnin í Hljóðrita í Hafnarfirði. Keflavískt Jamaíkureggí með hafnfirskum brag er því kannski ekki svo fjarri lagi.

Ekki má heldur gleyma heimildarmyndinni um ferð Hjálma til Jamaíka, Hærra ég og þú, eftir Bjarna Grímsson og Frosta Runólfsson. Myndin var sýnd við góðar undirtektir í Austurbæ fyrir nokkru og einnig er myndin sýnd á RIFF sem nú stendur yfir. DVD-útgáfa af myndin mun fylgja fyrsta upplagi plötunnar og verður því fáanleg í takmörkuðu upplagi.

Hjálmar ætla að fagna útgáfunni með tónleikum sínum á Réttum á morgun, fimmtudagskvöld en þar troða þeir upp á Nasa, ásamt Megasi & Senuþjófunum og Dr. Gunna. Formleg útgáfugleði verður loks á Nasa á næstunni.

Verslunin HAVARÍ opnar laugardaginn 19. september kl. 13 að Austurstræti 6 (Milli Gyllta kattarins og Shalimar). Búðin mun opna með miklu havaríi og hefja forsölu á nýjustu breiðskífu Hjálma, IV.Léttar og karabískar veitingar verða á boðstólnum auk þess sem Hjálmarnir sjálfir kíkja í heimsókn, taka lagið og árita nokkur eintök. Ýmis tilkippileg tilboð verða í gangi á opnunardegi á geisladiskum og vínylplötum frá Kimi Records og Borginni, fatnaði og fleira. Verslunar- og menningarglaðir borgarbúar ættu því að gera sér far um bregða sér í bæinn og njóta góðrar stundar í HAVARÍ.

Havarí er samstarfsvettvangur fjögurra fyrirtækja á sviði tónlistar og hönnunar, Kimi Records, Borgin hljómplötur, Gogoyoko og Skakkapopp. Þar mun að sjálfsögðu fást tónlist, tónlistartengdur varningur, myndlist, veggspjöld, fatnaður og annað sem verslunarstjórum dettur í hug að bjóða upp á. Búðin verður opin fram að jólum og mun standa fyrir allskyns viðburðum, tónleikum, sýningum og fleira.

IV Hjálmanna verður einnig í forsölu nú um helgina í 12 tónum og Eymundsson á Akureyri.